سیدہ فاطمہ زہراء رضی اللہ تعالی عنہا کی سیرت مبارکہ 

:۔ تعارف 
۔حضور اکرم صلی اللہ علیہ وسلم کی چوتھی صاحبزادی سیدہ فاطمۃ الزہرا رضی اللہ تعالی عنہا ہیں ۔ آپ کی والدہ ماجدہ حضرت خدیجۃ الکبریٰ رضی اللہ تعالی عنہا ہیں سیدہ فاطمہ زہرا کی پیدائش ولادت نبوی کے 41 ویں سال میں ہوئی ابن جوزی کے قول کے مطابق سیدہ فاطمۃ الزہرا رضی اللہ تعالی عنہا کی پیدائش اظہار نبوت سے پانچ سال پہلے کی ہے ۔ 
سیدہ فاطمۃ الزہرہ کے نام مبارک کی وجہ تسمیہ :
۔ سیدہ زہرا سیدۃ النساء العلمین اور سیدہ نساء الجنۃ ہیں اور آپ کا نام فاطمہ اس بنا پر رکھا گیا کہ اللہ تعالی نے ان کو اور ان کے محبین کو آتشِ دوزخ سے محفوظ رکھا ہے ۔ 
بتول ؛۔اس بنا پر رکھا گیا کہ آپ اپنے زمانے کی تمام عورتوں سے فضیلت دین حسن اور جمال میں جدا ہیں ۔ 
طاہرہ ؛۔اس بنا پر کہ زہر  ت  ہجیت اور جم میں کمال مرتبہ ہیں ۔ زکیہ اور رافیہ بھی آپ کےلقب ہیں۔ 
 نبی کریم صلی اللہ علیہ وسلم سے ہر درجہ مشابہت ۔ سیدہ زہرہ تمام لوگوں میں رسول خدا صلی اللہ علیہ وسلم سے راہ و روش صورت و سیرت اور کلام میں سب سے زیادہ مشابہ تھیں۔  ۔ رسول کریم صلی اللہ علیہ وسلم کی محبت حضرت سید النساء کے لئے :۔ 
رسول کریم صلی وسلم کی عادت کریمہ تھی جب سیدہ فاطمہ زہرا رضی اللہ تعالی عنہاآتیں تو آپ ان کے لیے کھڑے ہو جاتے اور ان کا ہاتھ تھام لیتے اور ان کی پیشانی پر بوسہ دیتے اور اپنی جگہ پر ان کو بٹھاتے۔ اسی طرح جب رسول کریم صلی اللہ علیہ وسلم فاطمہ الجنۃ  کےگھر تشریف لے کر جاتےتو آپ کھڑی ہو جاتیں اور آگے بڑھ کر ان کا ھاتھ تھام لیتیں اور بوسہ دیتیں۔
 نکاح مبارک ؛۔
 حضور اکرم صلی اللہ علیہ وسلم نے ان کا عقد مبارک حضرت علی مرتضی رضی اللہ تعالی عنہ سے ہجرت کے دوسرے سال رمضان مبارک میں غزوہ بدر کی واپسی پر فرمایا۔
 بعض مورخین غزوہ احد بھی کہتے ہیں اور ماہ ذی الحج میں شب عروسی واقع ہوئی ایک قول کے مطابق ماہ رجب میں لکھا ہوا اور ایک قول کے مطابق صفر کے مہینے میں اس وقت آپ سیدہ فاطمہ زہرا کی عمر شریف پندرہ سال ساڑھے پانچ ماہ کی اور حضرت علی کی عمر مبارک21 سال پانچ ماہ تھی ۔۔
 دو ہجری میں فاطمہ زہرہ رضی اللہ تعالی عنہا کا نکاح حضرت علی مرتضی رضی اللہ تعالی عنہاکے ساتھ ہوا روایتوں میں آیا ہے کہ سیدہ فاطمہ زہرا رضی اللہ تعالی عنہا کےلئےحضرت ابوبکر صدیق رضی اللہ تعالی نے پیام دیا تھا اور حضور اکرم صلی اللہ علیہ وسلم نےعلت بیان کرتے ہوئے فرمایا میں ان کے نکاح میں وحی کا انتظار کر رہا ہوں اس کے بعد حضرت عمر فاروق رضی اللہ تعالی نے ان کے لئے پیام دیا ان کو بھی اسی طرح جواب مرحمت فرمایا گیا مشکوت شریف میں مروی ہے کہ جب حضرت ابوبکر اور عمر رضی اللہ تعالی عنہما نے نکاح کے لیے پیغام دیا تو حضور صلی اللہ علیہ وسلم نے فرمایا کہ "وہ خورد سال" ہیں ۔
 ام ایمن رضی اللہ تعالی نے حضرت علی کو ترغیب دی۔  
 روضہ الاحباب میں کہا گیا ہے کہ صحابہ رضوان اللہ عنہم نے کہا آپ حضور صلی اللہ علیہ وسلم کے اہل اور خواص میں سے ہیں آپ جا کر ان کے لیے پیام دیں۔ 
 حضرت علی نے فرمایا "میں نے رسول اللہ صلی اللہ علیہ وسلم سے اس معاملے میں شرم رکھتا ہوں اور جب ابو بکر و عمر رضی اللہ تعالی عنہ کا پیام ردفرمایا تو میرا پیام کیوں کر قبول فرمائیں گے۔
 صحابہ نے فرمایا کہ" آپ حضور صلی اللہ علیہ وسلم کی بارگاہ میں بہت زیادہ مقرب اور حضور صل اللہ علیہ وسلم کے چچا کے صاحبزادے اور جناب ابوطالب کے فرزند ہیں جائیں اور شرم نہ کریں۔  
نزول وحی اور تقریب 
 حضرت علی رضی اللہ تعالی عنہ حضرت محمد صلی اللہ  علیہ وسلم کی بارگاہ میں حاضر خدمت ہوئے اور آپ کو سلام کیا رسول کریم صلی اللہ علیہ  وسلم نے سلام کا جواب دیتے ہوئے فرمایا"" اےابو طالب کے فرزند کیا بات ہے ہمارے پاس کیسے آنا ہوا ؟
 عرض کیا "میں اس لیے حاضر ہوا ہوں کہ میں فاطمہ رضی اللہ تعالی عنہا کا پیام اپنے لیے پیش کروں
 اس پر رسول کریم صلی اللہ علیہ وسلم نے مرحبا واھلا فرمایا اور اس کے بعد خاموش رہے حضرت انس رضی اللہ تعالی عنہ روایت کرتے ہیں کہ میں اس وقت آقا کریم صلی اللہ علیہ وسلم کے پاس موجود تھا اس وقت آپ صلی اللہ علیہ وسلم پر نزول وحی کی کیفیت طاری ہوئی اور اب اور نبی پاک صلی وسلم اس میں مستغرق ہو گئے جب اس کیفیت سے باہر آئے تو فرمایا اے انس رب کے پاس سے جبرایل میرے پاس آئے اور کہا "   اللہ تعالی ارشاد فرماتا ہے کہ فاطمہ زہرا کا نکاح علی مرتضی رضی اللہ تعالی عنہ کے ساتھ کر دیں" تواے انس جاؤ اور حضرت ابوبکر عمر عثمان و طلحہ اور زبیر اور انصار کی جماعت کو بلا کر لے آؤ "
جب تمام لوگ حاضر ہوگئے تو نبی پاک صلی اللہ علیہ وسلم نے خطبہ پڑھا حمدوثنا بیان کی اور نکاح کی ترغیب دی اور پھر حضرت فاطمہ کا نکاح حضرت علی کے ساتھ چار سو مثقال  حق مہر کے ساتھ فرمایا اور فرمایا اے علی کیا تم راضی ہو ؟حضرت علی نے فرمایا "میں نے قبول کیا" اور راضی ہوا پھر نبی کریم صل وسلم نے ایک تباق کھجوروں کا لیا اور جماعت صحابہ پر بکھیر کر لٹا دیا ۔
 لعاب دہن کا مبارک پانی۔
  امام جزری نے حصن حصین میں ابن حبان سے بیان کیا ہے کہ حضور صلی اللہ علیہ وسلم نے حضرت علی کا نکاح سیدہ فاطمہ رضی اللہ تعالی عنہا سے کردیا تورسول کریم صلی اللہ علیہ وسلم اپنے کاشانہ اقدس کی طرف چلےگئے  اور سیدہ فاطمہ رضی اللہ تعالی عنہا سے فرمایا تھوڑا سا پانی لاؤ پھر فاطمہ رضی اللہ تعالی عنہا لکڑی کے پیالے میں پانی لے کر آئیں رسول کریم صلی اللہ علیہ وسلم نے اس پیالے  میں اپنا لعاب دہن مبارک ڈالا اور سیدہ فاطمہ الزہرا رضی اللہ تعالی عنہا سے فرمایا میرے قریب ہو وہ قریب آئیں تو حضور صلی اللہ علیہ وسلم نے اس پانی کو ان کے سینے کے درمیان اور سر پر چھڑکا اور فرمایا کہ اے خدا میں ان کو اور ان کی اولاد کو تیری پناہ میں دیتا ہوں شیطان رجیم سے۔
 اس کے بعد فرمایا اے فاطمہ میری طرف اپنی پشت  کرو پھر حضور صلی اللہ علیہ وسلم نے ان کے شانوں کے درمیان پانی کے چھینٹے دیےا اور فرمایا خدا میں ان کو اور ان کی اولاد کو تیری پناہ میں دیتا ہوں شیطان رجیم سے 
 پھر فرمایا پانی اور لاؤ حضرت علی فرماتے ہیں" میں سمجھ گیا تھا کہ حضور صلی اللہ علیہ وسلم کیا کریں گے تو میں کھڑا ہوا اور پانی بھر کر لایا اور حضرت محمد  صلی اللہ علیہ وسلم نے اس پانی کو لیا اور اس میں لعاب دہن مبارک ڈالا اور مجھ سے فرمایا" میرے سامنے آؤ میں حضور صلی اللہ علیہ وسلم کے آگے کھڑا ہوگیا حضور صلی اللہ علیہ وسلم نے پانی کے چھینٹے میرے چہرے پر دیئے اور فرمایا اے خدا میں ان کو اور ان کی اولاد کو تیری پناہ میں دیتا ہوں شیطان رجیم سے" ۔ اس کے بعد فرمایا "بسم اللہ والبرکتہ کہہ کر اپنی زوجہ کے پاس جاؤ " ۔
ایک اور روایت میں ہے کہ رسول کریم صلی اللہ علیہ وسلم نکاح کے روز سیدہ فاطمہ کو بعد نماز عشاء حضرت علی کے گھر لائے اور پھر پانی کا پیالہ اٹھا کر اس میں لعاب دہن شریف ڈال کر نماز پڑھی اور دعا پڑھی اور حضرت علی سے فرمایا "اس کو پی لو"اور اس کے بعد حضور صلی اللہ علیہ وسلم نے وضو کیا اور سیدہ فاطمہ سے فرمایا" اس پانی کو پی جاؤ"
 اس کے بعد پھر وضو فرمایا اور فرمایا اے خدا یہ دونوں مجھ سے ہیں اور میں ان کا ہوں یا رب جس طرح تو نے مجھ سے ناپاکی دور کرکے پاک بنایا ہے اسی طرح ان کو پاک بنا "اس کے بعد دونوں  سے فرمایا اپنی خواب گاہ میں جاؤ اور فرمایا اے خدا ان کے درمیان محبت اور الفت شامل فرما اور ان کی اولاد میں برکت دے اور ان سے پریشانی کو دور فرمائے اور ان کے نصیب کو نیک گردان ان پر برکت نازل فرما اور ان سے بکثرت پاک اولاد پیدا فرما " ۔
سیدہ فاطمۃ الزہرا رضی اللہ تعالی عنہا کا رونا اور رسول پاک صلی اللہ علیہ وسلم کا تسلی دینا 
 سیدنا ابن عباس رضی اللہ تعالی عنہ سے روایت ہے کہ جب رسول کریم صلی اللہ علیہ وسلم نے سیدہ فاطمہ زہرا کا نکاح مبارک حضرت علی رضی اللہ تعالی عنہ سے کیا تووہ رونے لگی اس پر حضور صلی علیہ وسلم نے ان سے دریافت فرمایا اے میری لخت جگر کس بات پر تم رونے لگیں ۔انہوں نے کہا یا رسول اللہ صلی اللہ علیہ وسلم اپ نے ایسے شخص کے ساتھ نکاح کر دیا ہے جس کے پاس نہ مال ہے اور نہ کوئی اور چیز اس پر حضور صلی اللہ علیہ وسلم نے فرمایا" کیا تم اس پر راضی نہیں کہ اللہ نے زمین پر دواشخاص کو برگزیدہ بنایا جس میں سے ایک تمہارا والد ہے اور دوسرا تمہارا شوہر"۔
 ایک اور روایت میں ہے کہ فرمایا" کیا تم راضی نہیں اور میں نے اس سے نکاح کیا جو ازروئے اسلام سب سے پہلے مسلمانوں میں سے ہے ۔اور علم کے اعتبار سے ان سب میں دانا  ترین ہے تم میری امت کی عورتوں میں سب سے بہترین ہو جس طرح مریم علیہ السلام اپنی قوم میں تھیں ۔
حضرت علی کی زرہ مبارک
 روایت ہے کہ رسول کریم صلی اللہ علیہ وسلم نےحضرت علی رضی اللہ تعالی عنہ سے فرمایا  " علی کیا تمہارے پاس کچھ ہے؟ علی مرتضی رضی اللہ تعالئ عنہ نے فرمایا   ایک گھوڑا اور ایک زرہ رکھتا ہوں"۔رسول کریم صلی اللہ علیہ وآلہ وسلم نے ۔ فرمایا گھوڑا تمہارے لئے ضروری ہے لیکن زرہ کو فروخت کرو اور اس کی قیمت میرے پاس لے آؤ انہوں نے اس کو 480  درہم میں فروخت کر دیا اور قیمت  رسول پاک صلی اللہ وسلم کے پاس لے آئے  رسول اللہ صلی اللہ علیہ وسلم نے حضرت  بلال رضی اللہ تعالی عنہ کو بلا کر انہیں کچھ رقم دی کہ وہ اس میں سے عطر اور خوشبو وغیرہ خرید لیں اور حضرت ام سلیم رضی اللہ تعالی عنہا کو بلاکر باقی رقم دی کے اس میں سے فاطمہ رضی اللہ تعالی عنہا کے لیے جہیز کا سامان فراہم کریں اور امور خانہ داری کا سامان مہیا کر دیں انہوں نے جو سامان ضرورت جمع فرمایا اس کی تفصیل درج ذیل ہے۔
  دو چادریں ۔
دو کتان کی نہا لیںں
 چار بالشت کپڑا
 چاندی کے دو بازوبند
 گدا تکیہ۔
  ایک پیالہ ۔
ایک چکی۔
  ایک مشکیزہ اور کچھ مشروبات وغیرہ خریدے۔ 
 امور خانہ داری کی تقسیم 
 روایت ہے کہ رسول کریم صلی اللہ علیہ وسلم نے امور خانہ داری کو اس طرح مقرر فرمایا کہ گھر کے کام مثلا روٹی پکانا ،جھاڑو دینا ،چکی پیسنا وغیرہ سیدہ فاطمہ انجام دیں گی اور باہر کے کام جانوروں کو چارہ پانی دینا اور بازار سے سودا سلف خرید کر لانا یہ علی مرتضی یا ان کی والدہ فاطمہ بنت اسد کرینگی ۔
 ولیمے کی دعوت
 امام احمد مواہب الدنیا میں روایت کرتے ہیں کہ اہل سیر بیان کرتے ہیں کہ علی مرتضی رضی اللہ تعالی عنہ نے سیدہ فاطمہ رضی اللہ تعالی عنہا پر ولیمہ کیا اس وقت ان کے پاس ولیمے کے لئے کچھ بھی موجود نہ تھا مگر انہوں نے ولیمہ کیا ان کے ولیمے میں چند صاع جوکچھ کھجوریں اور حیس کا کھانا تھا ۔
 حضرت فاطمہ رضی اللہ تعالی عنہا کی امور خانہ داری۔
  روایات میں ہے کہ سیدۃ النساء العالمین خود آگ کے سامنے بیٹھ کر روٹی پکاتیں گھر میں جھاڑو دیتی چکی پستی تھیں جس سے ان کا رنگ مبارک متغیر ہو گیا تھا اور ان کے ہاتھوں میں کام کاج کی وجہ سے نشانات پڑ گئے تھے اور ان کے کپڑے گرد آلود ہو جاتے تھے مشکیزہ اٹھانے   کی وجہ سے ان کے سینے پر نشان پڑ گئے تھے ایک مرتبہ  خادم کی طلب کے لیے رسول کریم صلی اللہ علیہ وسلم کے پاس تشریف لے گئے تو رسول کریم صلی اللہ علیہ وسلم نے فرمایا میں تمہیں ایسی چیز بتاتا ہوں جو خادم سے بہتر ہے جب تم سونے کا ارادہ کرو تو  33بار سبحان اللہ 33 بار الحمد للہ اور 34 بار اللہ اکبر پڑھ لیا کرو. حضرت علی فرماتے ہیں میں نے اس کو کبھی ترک نہیں کیا حتیٰ کہ صفین کی رات کو بھی.
 ۔ اولاد مبارک :
۔ سیدہ فاطمہ رضی اللہ تعالی عنہا سے امام حسن امام حسین محسن زینب ام کلثوم اور رقیہ علیہ السلام پیدا ہوئے محسن اور رقیہ عہد طفولیت میں ہی وفات پاگئے اور سیدہ زینب حضرت عبداللہ بن جعفر رضی اللہ تعالی عنہ سے اور سیدہ ام کلثوم حضرت  عمر الخطاب رضی اللہ عنہ کی زوجیت میں آئیں اور ان کی کوئی اولاد باقی نہ رہی اگرچہ سیدہ ام کلثوم کا حضرت عمر فاروق اعظم سے ایک فرزند پیدا ہوا اور ان کا نام زید تھا .
وصال مبارک 
 سیدہ فاطمہ زہرا کی وفات 3 رمضان المبارک 11 ہجری رسول اللہ سلم کی وفات کے چھ ماہ بعد واقع ہوئی آپ جنت البقیع شریف میں ہی رات کے وقت میں مدفونہویں۔ 
از قلم پروفیسر عالمہ روبینہ امین