Hazrat mymoona bint e haris

حضرت میمونہ رضی اللہ تعالی عنہا کی سیرت طیبہ 

تعارف  :۔

حضرت میمونہ رضی اللہ تعالی عنہا کا نام ہرہ تھا ۔حضور اکرم صلی اللہ علیہ وسلم نے ان کا نام تبدیل کرکے "میمونہ" رضی اللہ تعالی عنہا رکھا ۔یہ یمن سے مشتق ہے اور اس کے معنی برکت اور مبارک ہیں 

 ولادت :

۔اعلان نبوت سے سولہ سال پہلے آپ کی ولادت باسعادت مقام سرف متصل مکہ مکرمہ میں ہوئی۔

 خاندانی پس منظر  

آپ کا تعلق قبیلہ قریش سے تھا ۔والد کا نام حارث بن حزن اور والدہ ہند بنت عوف قبیلہ حمیر سے تھیں

۔ ہند بنت عوف کی خوش قسمتی :۔ ام المومنین حضرت میمونہ رضی اللہ تعالی عنہا کی والدہ ماجدہ ہند بنت عوف کو سسرال کے لحاظ سے

" اکرام الناس" کہا جاتا ہے ۔ ابن قتیبہ نے "معارف" میں لکھا ہے کہ پوری روئے زمین میں ہند بنت عوف سے زیادہ کوئی عورت اپنے دامادوں کے لحاظ سے بزرگ اور خوش قسمت نہیں ۔آپ کے دامادوں میں سیدنا ابوبکر صدیق رضی اللہ تعالی عنہ ۔ 

سید الشہداء حضرت سیدنا حمزہ بن عبدالمطلب رضی اللہ عنہ ۔

 سیدنا حضرت عباس رضی اللہ تعالی عنہ ۔ 

سیدنا علی رضی اللہ تعالی عنہ ۔ حضرت شداد بن الحارضی اللہ تعالی عنہ ۔

 ہند بنت عوف کی دوسری خوش قسمتی یہ ہے کہ ان کی دو بیٹیاں حضرت زینب بنت خزیمہ اور حضرت میمونہ رضی اللہ تعالی عنھما یکے بعد دیگرے حضور صلی اللہ علیہ وسلم کے عقدمیں رہیں۔ 

 رسول کریم صلی اللہ علیہ وسلم سے نکاح سے پہلے کے حالات :

۔ حضرت میمونہ رضی اللہ تعالی عنہا  زمانہ جاہلیت میں مسعود بن عمرو ثقفی کی زوجیت میں تھیں۔ باہم نااتفاقی ہونے پر جدائی ہوگئی اس کے بعد عوام عبداللہ کے نکاح میں آئیں جو کچھ عرصے بعد فوت ہوگئے ۔ رسول کریم صلی اللہ علیہ وسلم سے نکاح ۔ حضور اکرم صلی اللہ علیہ وسلم کے چچا حضرت عباس رضی اللہ تعالی عنہ نے حضور اکرم صلی اللہ علیہ وسلم کو حضرت میمونہ سے نکاح کے لیے ترغیب دی۔ اور حضرت عباس رضی اللہ تعالی عنہ کی اہلیہ یعنی حضور صلی اللہ علیہ وسلم کی چچی حضرت لبابۃ الکبریٰ جن کی کنیت ام الفضل تھی انہوں نے آپ رضی اللہ تعالی عنہا کو حضور صلی اللہ علیہ وسلم سے نکاح پر آمادہ کیا ۔ عمرۃالقضاء :۔ 

جب 7 ہجری میں سید المرسلین خاتم النبیین صلح حدیبیہ کے وقت کا قضاء کیا ہوا عمرہ ادا کرنے کے لیےمکہ تشریف لائے اسی موقع پر نکاح منعقد ہوا سرف کے مقام پر ہی رسول کریم احرام کی حالت میں تھے صحابہ کرام رضوان اللہ تعالی اجمعین بھی معتمر اور محرم تھے ۔عم رسول حضرت عباس رضی اللہ تعالی عنہ بھی حالت احرام میں تھے اور آپ ہی اپنی خواہرنسبتی سیدہ میمونہ رضی اللہ تعالی عنہا کے وکیل بنے اور آپ نے ہی خطبہ نکاح پڑھا۔ 

 جب مدینہ واپس ہوئے تو سرف کے مقام پر رسم عروسی ادا ہوئی ۔عجیب اتفاق یہ ہے کہ حضرت میمونہ رضی اللہ تعالی عنہا کی ولادت ، نکاح ، زفاف اور ان کی وفات ایک ہی موضع میں واقع ہوئی۔ 

 وفات :

۔حضرت میمونہ رضی اللہ تعالی عنہا کی وفات 80 برس کی عمر میں مشہور تر قول کے بموجب 51 ہجری میں ہوئی ان کی نماز جنازہ ان کے بھانجے حضرت ابن عباس رضی اللہ تعالی عنہ نے پڑھائی۔نوار یہ کے مقام پر آپ رضی اللہ تعالی عنہا کا مزار مبارک ہے نوار یہ جس کا قدیم نام سرف ہے ۔

 اوصاف حمیدہ :۔

 حضرت میمونہ رضی اللہ تعالی عنہا کی زندگی سادگی تقویٰ اور قناعت سے عبارت تھی ان سے 76سے زیادہ احادیث روایت ہیں اور کئ بلند پایا بزرگوں نے ان سے روایات کی ہیں وہ انتہائی خشوع و خضوع کے ساتھ عبادت کیا کرتیں اور بے حد رحمدل تھیں ہر لحظہ خدا سے ڈرتے رہنا ان کا خاص وصف تھا چنانچہ حضرت عائشہ رضی اللہ تعالی عنہا فرماتی ہیں کہ "میمونہ رضی اللہ تعالی عنہا خدا سے بہت ڈرتی تھیں" اور صلہ رحمی کرتی تھیں انہیں ہر قدم پر احکام خداوندی اور ارشادات نبوی صلی اللہ علیہ وسلم کا بڑا خیال رہتا تھا اگر کسی کو خلاف سنت کام کرتے پایا تو ٹوک دیا اور پھر بڑے پر شفقت لہجے میں حضور صلی اللہ علیہ وسلم کا طریقہ سمجھا دیتی تھیں فقہ سے متعلق انہیں کافی معلومات حاصل تھیں یہی وجہ تھی کہ اکثر اہل علم بزرگ ان سے بھی فیض حاصل کرتے تھے ۔حضرت میمونہ رضی اللہ تعالی عنہا میں انسان دوستی اور رحم و اکرام کا جذبہ کوٹ کوٹ کر بھرا ہوا تھا یہی وجہ تھی کے آپ کو غلام اور کنیز آزاد کرنے کا بے حد شوق تھا ایک دفعہ آپ نے لونڈیوں کو آزاد کیا تو آنحضرت صلی اللہ علیہ وسلم نے ان کے لئے دعائے خیر فرمائی۔

از قلم؛ پروفیسر روبینہ امین