حضرت 
جویریہ رضی اللہ تعالی عنہ کی سیرت طیبہ تعارف :
۔حضرت جویریہ رضی اللہ تعالی عنہا کا اصل نام برہ تھا مگرآپ صلی اللہ علیہ وآلہ وسلم نے اسے بدل کر جویریہ رکھ دیا حضرت جویریہ رضی اللہ تعالی عنہ حارث بن ضرار کی بیٹی تھیں جو قبیلہ بنی مصطلق کا سردار تھا ۔مسافع بن صفوان سے شادی ہوئی جو غزوہ مریسیع میں قتل ہوا ۔
اس لڑائی میں کثرت سے کنیزیں اور غلام مسلمانوں کے ہاتھ آئے انہیں میں حضرت جویریہ رضی اللہ تعالی عنہا بھی تھیں جب مال غنیمت کی تقسیم ہوئی تو وہ ثابت بن قیس کے حصے میں آئیں ۔ 
نبی کریم صلی اللہ علیہ وسلم سے عقد نکاح :۔ حضرت جویریہ رضی اللہ تعالی عنہا کے والد حارث عرب کے رئیس تھے حضرت جویریہ رضی اللہ تعالی عنہا جب گرفتار ہوئیں تو حارث حضور صلی اللہ علیہ وآلہ وسلم کی خدمت میں آئے۔اور فرمایا "میری بیٹی کنیز نہیں بن سکتی میری شان سے بالاتر ہے میں اپنے قبیلے کا سردار اور ریس عرب ہوں آپ اس کو آزاد کر دیں"
 آپ صلی اللہ علیہ وسلم نے فرمایا" کیا یہ بہتر نہیں ہوگا کہ خود جویریہ کی مرضی پر چھوڑ دیا جائے"
 حارث نے جاکر حضرت جویریہ رضی اللہ تعالی عنہا سے کہا کہ محمد صلی اللہ علیہ وسلم نے تمہاری مرضی پر رکھا ہے مجھے رسوا نہ کرنا حضرت جویریہ رضی اللہ عنہانے فرمایا "میں رسول کریم صلی اللہ علیہ وسلم کی خدمت میں رہنا پسند کرونگی" چنانچہ آپ صلی اللہ علیہ وسلم نے ان سے شادی کرلی جب لوگوں کی زبانوں پر یہ بات آئی تو لوگوں نے قبیلہ بنی مصطلق کے تمام کنیزوں اورغلاموں کو اس بنا پر آزاد کردیا کہ آنحضرت صلی اللہ علیہ وسلم سے رشتہ مصاہرت قائم کر لیا آزاد شدہ غلاموں کی تعداد ایک روایت میں 700 کے قریب بتائی گئی ہے ۔ حضرت جویریہ رضی اللہ تعالی عنہا سے جب آپ صلی اللہ علیہ وسلم کا نکاح ہوا تو تمام اسیران جنگ جو اہل فوج کے حصے میں آ گئے تھے ان کو رہا کردیا گیا فوج نے کہا جس خاندان میں رسول اللہ صلی اللہ علیہ وسلم نے شادی کرلی وہ غلام نہیں ہو سکتا ۔ حالات زندگی :۔
 حضرت جویریہ رضی اللہ تعالی عنہا زاہدانہ زندگی بسرکرتی تھیں ایک دن صبح دعا کر رہی تھیں حضرت محمد صلی اللہ علیہ وسلم گزر رہے تھے اور دیکھتے ہوئے چلے گئے دوپہر کے قریب آئے تب بھی ان کو ایسی حالت میں پایا ۔تو رسول کریم صلی اللہ علیہ وسلم نے انہیں ایک دعا سکھا دی اور فرمایا کہ اتنی دیر عبادت کی جگہ یہ دعا پڑھ لیا کرو ۔
 علم و فضل :
۔حضرت جویریہ رضی اللہ تعالی عنہا کا درجہ بھی بہت بلند تھا ان سے کئی احادیث مروی ہیں حضرت جابر حضرت عبداللہ بن عمر اور حضرت مجاہد رضی اللہ تعالی عنہ جیسے جلیل القدر بزرگوں نے ان کے علم و فضل سے فیض حاصل کیا اور ان کی علمی فضیلت کا اعتراف کیا۔
 حضرت عائشہ صدیقہ رضی اللہ تعالی عنہا فرماتی ہیں" کہ میں نے کسی عورت کو حضرت جویریہ رضی اللہ تعالی عنہا سے بڑھ کر اپنی قوم کے حق میں مبارک نہیں دیکھا کہ ان کے سبب سے بنو مصطلق کے سیکڑوں گھرانے آزاد کر دیے گئے"  
وفات :۔
 حضرت جویریہ رضی اللہ تعالی عنہا نے ربیع الاول 50 ہجری میں وفات پائی اور جنت البقیع میں دفن ہوئیں اس وقت ان کی عمر مبارک پینسٹھ برس تھی۔ 
 حضرت جویریہ رضی اللہ تعالی عنہ کی زندگی کا روشن پہلو:۔
 حضرت جویریہ رضی اللہ تعالی عنہا کی زندگی کا یہ پہلو کس قدر کے خوبصورت  ہے کہ قبول اسلام سے قبل وہ مسلمانوں کی سخت دشمن تھیں ان کے چاروں طرف کفر و شرک کا اندھیرا چھایا ہوا تھا اور ان کے خاندان کے تمام لوگ اسلام کو ملیامیٹ کرنے کے لئے شمشیر بکف رہتے تھے مگر جب اسیری کی حالت میں انہیں مسلمانوں کو قریب سے دیکھنے کا موقع ملا اور اس کے بعد جب آنحضرت صلی اللہ علیہ وسلم کا قرب نصیب ہواتو ان کی دنیا میں انقلاب برپا ہو گیا ان کا دل نور ایمان سے جگمگا اٹھا اور آنکھوں کے سامنے سے کفر و ضلالت کا پردہ اٹھ گیا جس کے بعد ان کے باپ نے خاندانی عزت اور آبرو اور اپنی ناموس کا واسطہ دے کر انہیں اسی ظلمت کدے میں واپس لے جانا چاہا تو بآدہ توحید سے سرشار بیٹی نے صاف انکار کر دیا انہوں نے ایک لمحے کے لئے بھی یہ نہ سوچا کہ محمد صلی اللہ علیہ وسلم کے قدموں میں رہ کر دنیاوی عیش و آرام اور رئیسانہ زندگی کے ٹھاٹھ باٹھ سے محروم ہو جائیں گی بلکہ انہوں نے راہ ہدایت پر رہتے ہوئے فقروفاقہ کی بے سروسامان زندگی کو ترجیح دی یہ اللہ کے نیک بندوں اور ایمان والوں کی چند روزہ صحبت اور ہمنشینی کا نتیجہ تھا کہ انہوں نے عورت ہوتے ہوئے بھی عیش و طرب کی پر آسائش زندگی کو پائے حقارت سے ٹھکرا دیا اور اس کے بعد زہد و عبادت کو اپنا اوڑہنا بچھونا بنا لیا بے شک سیدھے راستے پر چلنے والے نیک لوگوں کی صحبت انمول دولت ہے اسی لئے دوستی اور ہم نشینی کے لئے ہمیشہ ایسے لوگوں کو منتخب کرنا چاہیے جو اللہ اور اس کے رسول کے احکام پر چلتے ہیں اور نیکو کار ہوں ۔ ازقلم: ۔ پروفیسر عالمہ روبینہ امین